Алынды: 28.09.2026
Қабылданды: 19.10.2026
Онлайн жарияланды: 30.10.2026
ӘОЖ: 616.53-002.25:615.03:579.61
DOI: 10.53511/pharmkaz.2026.5.2
Мақала түрі: Түпнұсқалық ғылыми мақала
(пилоттық бірмезеттік клиникалық-микробиологиялық зерттеу)
ACNE VULGARIS КЕЗІНДЕ АДЪЮВАНТТЫ ПРОБИОТИКАЛЫҚ ТЕРАПИЯНЫ ҚОЛДАНУДЫҢ КЛИНИКАЛЫҚ-ФАРМАКОЛОГИЯЛЫҚ ПЕРСПЕКТИВАЛАРЫ: ІШЕК МИКРОФЛОРАСЫН КУЛЬТУРАЛЫҚ ЗЕРТТЕУДІҢ ПИЛОТТЫҚ НӘТИЖЕЛЕРІ
Джумабаева А.А.¹, Абуова Г.Н.¹
¹ «Оңтүстік Қазақстан медицина академиясы» АҚ, Шымкент, Қазақстан
Кіріспе. Acne vulgaris кезінде пробиотиктерді қосымша қолдану мүмкіндігі жүйелі фармакотерапияның қауіпсіздігі және ішек микробиотасы мен терідегі қабынудың ықтимал байланысы тұрғысынан қарастырылады. Мұндай емнің клиникалық-фармакологиялық перспективаларын бағалау үшін пациенттердің микробиологиялық сипаттамаларын анықтау маңызды. Алайда культуралық зерттеу пробиотикалық препараттың тиімділігі мен қауіпсіздігін өздігінен дәлелдемейді.
Мақсаты. Acne vulgaris бар пациенттердің өсірілетін ішек микрофлорасындағы өзгерістерді сипаттау және олардың адъювантты пробиотикалық фармакотерапия жөніндегі кейінгі зерттеулерді жоспарлаудағы маңызын бағалау.
Материалдар мен әдістер. 2026 жылғы қаңтар-наурыз айларында Шымкент қаласында тексерілген acne vulgaris бар 14 пациентке (жасы 24-45 жас, медианасы – 30,5 жас; 12 әйел, 2 ер адам) бірмезеттік клиникалық-микробиологиялық зерттеу жүргізілді. Индигенді (Lactobacillus spp., Bifidobacterium spp., Enterococcus spp., типтік Escherichia coli) және шартты-патогенді микроорганизмдерді сандық бағалаумен нәжістің бактериологиялық зерттеуі орындалды. Сипаттамалық статистика әдістері қолданылды.
Нәтижелер. Lactobacillus spp. мөлшерінің төмендеуі барлық 14 пациентте (100,0%), Bifidobacterium spp. – 11 (78,6%), Enterococcus spp. – 9 (64,3%), типтік E. coli – 8 (57,1%) пациентте анықталды. Кемінде екі индигенді таксонның қатар тапшылығы 100% жағдайда тіркелді. Шартты-патогенді флораның шамадан тыс өсуі 6 (42,9%) қатысушыда байқалды (Clostridium spp. – 21,4%; Staphylococcus aureus, Candida glabrata, Proteus mirabilis – әрқайсысы 7,1%). Тапшылық профиль 8 (57,1%), аралас профиль 6 (42,9%) пациентте анықталды.
Талқылау. Анықталған культуралық профильдер қосымша пробиотикалық емге арналған болашақ клиникалық-фармакологиялық зерттеулерде пациенттердің бастапқы сипаттамалары ретінде маңызды болуы мүмкін. Бұл жұмыста препараттардың әсері, тиімділігі, қауіпсіздігі немесе антибиотиктерді қолдануды азайту мүмкіндігі бағаланған жоқ. Негізгі шектеулер — шағын іріктеме, салыстыру тобының болмауы және культуралық әдістің мүмкіндіктері.
Қорытынды. Зерттелген топта өсірілетін Lactobacillus spp. және Bifidobacterium spp. титрлерінің төмендеуі жиі байқалды. Деректер адъювантты пробиотикалық терапия бойынша бақыланатын клиникалық-фармакологиялық зерттеулердің гипотезасы мен дизайнын қалыптастыру үшін пайдалы; алайда нақты штаммдарды, дозаларды немесе дәрілік түрлерді тағайындауды дәлелдемейді.
Түйінді сөздер: acne vulgaris; фармакотерапия; пробиотикалық дәрілік заттар; фармабиотиктер; «ішек-тері» осі; Lactobacillus; Bifidobacterium; антибиотикке төзімділік.
количество просмотров / 👁 85