Алынды: 28.07.2026
Қабылданды: 31.07.2026
Онлайн жарияланды: 21.08.2026
ӘОЖ: 615.453.64; 615.281
DOI: 10.53511/pharmkaz.2026.4.19
КЛИНИКАЛЫҚ МАҢЫЗЫ БАР МИКРООРГАНИЗМДЕРГЕ ҚАТЫСТЫ КС-250 ТАБЛЕТКАЛАНҒАН КОМПОЗИЦИЯСЫН ӘЗІРЛЕУ, ФАРМАЦЕВТИКАЛЫҚ БАҒАЛАУ ЖӘНЕ БАКТЕРИЦИДТІК БЕЛСЕНДІЛІГІН ЗЕРТТЕУ
Шепилов Д.А.1,*, Таганов Ж.И.1, Джумагазиева А.Б.1, Кенешева С.Т.1, Джумабаева С.М.1, Жантуриев Б.М.2, Букеева Т.А.1, Тұрғанбай С.3,4, Сейсембекова А.Б.1
1«Инфекцияға қарсы препараттар ғылыми орталығы» АҚ, Алматы, 050060, Қазақстан
2Қазақстан Республикасы Денсаулық сақтау министрлігінің Дәрілік заттар мен медициналық бұйымдарды сараптау ұлттық орталығы Алматы қаласындағы аумақтық филиалының зертханалары бар Сынақ орталығының биологиялық сынақтар зертханасы, Алматы, 050000, Қазақстан
3Қазақ ұлттық қыздар педагогикалық университетінің жаратылыстану ғылымдары факультеті, Алматы, 050000, Қазақстан
4Қазақстан-Британ техникалық университеті, Мұнай инженериясы мектебі, «Бір белдеу, бір жол» зерттеу орталығы, Алматы, 050000, Қазақстан
*Хат-хабарға жауапты автор: shepilov2002@gmail.com
Кіріспе: Құрамында йод бар кешендерді қатты дәрілік түрлерге айналдыру таблеткалардың ыдырауын, белсенді заттың босап шығуын және микробқа қарсы белсенділігін сақтай отырып, жеткілікті механикалық беріктікті қамтамасыз етуді талап етеді. Зерттеудің мақсаты тікелей сығымдау әдісімен КС-250 таблеткаланған композициясын әзірлеу, оның фармацевтикалық сапасын бағалау және клиникалық маңызы бар бактерияларға қатысты бактерицидтік белсенділігін анықтау болды.
Әдістер: Нысаналы массасы 500 мг және құрамында номиналды 60 мг КС-250 бар таблеткалар MicroceLac® 100, повидон К30 және магний стеараты қолданылып дайындалды. 3,24 және 6,96 кН сығымдау күштері таблеткалардың үгітілуі мен ыдырауы бойынша салыстырылды. Таңдалған композиция негізгі фармакопеялық сапа көрсеткіштері бойынша бағаланды. Сегіз референттік, резистентті және клиникалық бактериялық штаммға қатысты бактерицидтік белсенділік сұйық қоректік ортада сериялық сұйылту әдісімен үш қайталауда анықталды.
Нәтижелер: Сығымдау күшін 3,24-тен 6,96 кН-ға дейін арттыру үгітілу көрсеткішін 0,81-ден 0,21%-ға дейін төмендетті, ал ыдырау уақытын 1,62-ден 4,62 минутқа дейін арттырды. 6,96 кН жағдайында алынған таблеткалардың үгітілуі 0,20%, ыдырау уақыты 4 мин 54 с, КС-250 мөлшері 63,05 мг/таблетка болды, ал 45 минут ішінде номиналды мөлшерінің 102,95%-ы босап шықты. Бағаланған барлық көрсеткіштер белгіленген қабылдау критерийлеріне сәйкес келді. Ең төмен бактерицидтік концентрация зерттелген Escherichia coli, Staphylococcus aureus және Pseudomonas aeruginosa штаммдары үшін 60 мг/мл, ал Enterococcus faecalis және Enterococcus faecium үшін 30 мг/мл болды.
Талқылау: 6,96 кН сығымдау күші КС-250 босап шығуын шектемей, таблеткалардың механикалық беріктігі мен жылдам ыдырауы арасындағы ең қолайлы арақатынасты қамтамасыз етті. Бактерицидтік белсенділіктің сақталуы КС-250-ді таблеткаланған композицияға енгізу оның микробқа қарсы функциясының жоғалуына әкелмегенін көрсетеді және таңдалған MicroceLac® 100–повидон К30 матрицасын одан әрі әзірлеуге негіз болады.
Түйін сөздер: фармацевтикалық композиция; қатты дәрілік түрлер; таблеткалар; микробқа қарсы заттар; белсенді фармацевтикалық субстанциялар; құрамында йод бар қосылыстар.
количество просмотров / 👁 15